У Мінскай вобласці вынесены на абмеркаванне праект стратэгіі ўстойлівага развіцця да 2040 года. Аб гэтым карэспандэнту БЕЛТА паведамілі ў прэс-службе Мінскага аблвыканкама.

У рамках праекта міжнароднай тэхнічнай дапамогі “Падтрымка намаганняў Рэспублікі Беларусь у нацыяналізацыі і лакалізацыі Мэт устойлівага развіцця” пры садзейнічанні НДЭІ Міністэрства эканомікі распрацаваны праект стратэгіі ўстойлівага развіцця Мінскай вобласці да 2040 года.

Стратэгія ўстойлівага развіцця рэгіёна – дакумент, у якім сістэмна выкладаюцца мэты, прыярытэты і напрамкі сацыяльна-эканамічнага развіцця вобласці на перспектыву з улікам прынцыпаў устойлівага развіцця, уключаючы абгрунтаванне спосабаў вырашэння канкрэтных рэгіянальных праблем і пералік мер для дасягнення пастаўленых мэт.

Як адзначана ў праекце, стратэгічная мэта доўгатэрміновага развіцця Мінскай вобласці – рост дабрабыту і якасці жыцця насельніцтва на аснове дасягнення высокай устойлівасці рэгіянальнай эканомікі з улікам экалагічнага складальніка.

Праект стратэгіі ўстойлівага развіцця размешчаны на сайце Мінскага аблвыканкама, які запрашае прыняць удзел у абмеркаванні дакумента. Заўвагі і прапановы можна накіраваць у камітэт эканомікі да 4 красавіка 2025 г. уключна.