Сёння, 21 мая, старшыня Мінаблвыканкама Аляксей Кушнарэнка праводзіць прыём грамадзян у Дзяржынску. Да губернатара папярэдне запісаліся 6 чалавек: па кожным з агучаных пытанняў кіраўнік Міншчыны даў канструктыўныя адказы, некаторыя пытанні ўзяў на кантроль.

– Падчас такіх прыёмаў грамадзян становіцца зразумела, якія праблемы хвалююць нашых людзей. Па выніках прыёму ў Дзяржынску можна сказаць, што гэта пытанні добраўпарадкавання, утрымання дарог, інжынернай інфраструктуры, навядзення парадку.

Асобна губернатар спыніўся на праблеме добраўпарадкавання возера каля вёскі Жардзяжжа Лагойскага раёна.

– Лічу, што тут мясцовыя органы ўлады не дапрацавалі. Павінны быць канкрэтныя рашэнні, бо гэты водны аб’ект патрабуе да сябе ўвагі. Акрамя таго, людзі перажываюць за гэтае месца, хочуць, каб яно было добраўпарадкавана. Прычым яны не абыякавыя да лёсу сваіх населеных пунктаў, гатовы прымаць актыўны ўдзел у іх добраўпарадкаванні. Безумоўна, улада павінна падтрымліваць такія ініцыятывы, – упэўнены губернатар.

Пры гэтым ён сказаў: нярэдка людзі прыходзяць з сапраўды цяжкімі пытаннямі.

– Аднак людзі чакаюць ад нас канкрэтных рашэнняў. І мы, як органы ўлады, мусім іх прымаць. А калі не хапае нашых кампетэнцый, павінны іх выносіць ужо на рэспубліканскі ўзровень, у тым ліку заканадаўчы пры неабходнасці.

Што да вёскі Путчына, жыхары якой папрасілі вырашыць пытанні з электразабеспячэннем і добраўпарадкаваннем дарогі — гэта жывы населены пункт, які нельга абдзяляць увагай.

– Прыемна чуць, што людзі пераязджаюць з буйных гарадоў у невялікія сельскія населеныя пункты, гарадскія пасёлкі: вяртаюцца на малую радзіму, – адзначыў Аляксей Кушнарэнка. – Пры гэтым яны ставяць перад уладай абсалютна нармальныя пытанні па якасці жыцця і ўладкаванні гэтых населеных пунктаў. Мы разам з датычнымі органамі рэспубліканскай улады, абласнымі, раённымі службамі павінны ствараць людзям якасныя ўмовы для жыцця. І на гэта накіравана наша праца.