Развіццё раёнаў Прыпяцкага Палесся і рэалізацыя адпаведнай праграмы сталі тэмамі нарады ў Прэзідэнта Беларусі Аляксандра Лукашэнкі, перадае карэспандэнт БЕЛТА.
“Парадак дня нашай нарады вызначаны даўно – пытанне развіцця Палесся да 2030 года, – сказаў кіраўнік дзяржавы. – Нагадаю, што гэта праграма – адно з ключавых перадвыбарных абяцанняў Прэзідэнта палешукам. Выбары адбыліся даўно. Гэта не значыць, што мы там нічога не рабілі. Вельмі шмат зроблена”.
Прэзідэнт адзначыў, што ў гэтым годзе ў рабоце на Палессі адчуваюцца вынікі. “Але гэта толькі маленькія першыя крокі. Работы шмат”, – папярэдзіў беларускі лідар.
Кіраўнік дзяржавы расказаў, што нядаўна агледзеў усе раёны Палесся і мае поўнае ўяўленне, як палешукі гаспадараць на зямлі.
Праграма да 2030 году ахоплівае дзевяць раёнаў, дзе жывуць 350 тыс. чалавек.
“Закранаючы праграму, мы павінны ведаць і разумець, якія трэба правесці мерапрыемствы ў рамках праграмы і па-за ёй, каб палешукі заўважылі, ды і ўся Беларусь, што мы сур’ёзна займаемся Палессем. З аднаго боку. З другога – мы заўсёды павінны памятаць, а ці ёсць у нас на гэта грошы для таго, каб гэтыя мерапрыемствы ажыццявіць”, – заўважыў беларускі лідар.
У сувязі з гэтым ён папрасіў у дакладах адысці ад “залішняй савецкасці”, каб не атрымалася так, што грошы выдзелілі пад нейкія задумы і планы, а рэзультатаў у выніку не заўважылі. “Якраз для гэтага патрэбны канкрэтныя мерапрыемствы, прадпрыемствы, якія будуць садзейнічаць з’яўленню новых працоўных месцаў (хоць гэта сёння не самае галоўнае), развіццю Палесся на стагоддзі, назаўсёды”, – падкрэсліў Аляксандр Лукашэнка.
“Усё павінна быць дакладна падлічана, выверана і галоўнае – у перспектыве прыносіць эканамічную аддачу. Асабліва калі размова ідзе пра бюджэтныя сродкі. Лішніх грошай у краіне няма, – сказаў Прэзідэнт. – Мерапрыемствы праграмы павінны быць канкрэтнымі, укладвацца ў просты алгарытм: мы павінны бачыць мэту, паставіць перад сабой пэўныя задачы і дзейнічаць на вынік. Аб гэтым я вас папярэджваў. Як мне дакладваюць, у цэлым вы іх аптымізавалі. Аднак па-ранейшаму яны не забяспечаны ў поўным аб’ёме грашыма. І фінансавы разрыў значны”.
Кіраўнік дзяржавы звярнуў увагу, што не хапае прыкладна Br400 млн, або 6 працэнтаў агульнага аб’ёму сродкаў, выдзеленых на праграму (амаль Br6,5 млрд). У сувязі з гэтым Прэзідэнт папрасіў даць канкрэтны адказ на галоўнае пытанне: за кошт якіх фінансавых крыніц плануецца рэалізаваць адпаведныя мерапрыемствы і што гэта будуць за мерапрыемствы.
Аляксандр Лукашэнка адзначыў, што курыраваць работу па выкананні праграмы будзе сапраўдны паляшук Міхаіл Русы – упаўнаважаны прадстаўнік кіраўніка дзяржавы ў Брэсцкай вобласці і старшыня Пастаяннай камісіі па заканадаўстве і дзяржаўным будаўніцтве Савета Рэспублікі Нацыянальнага сходу Рэспублікі Беларусь.
Прэзідэнт закрануў шэраг канкрэтных аспектаў у развіцці Палесся. Адзін з іх – прыродныя выклікі, якія патрабуюць комплексных, сістэмных рашэнняў і, магчыма, буйных інвестыцыйных праектаў. Сёння Брэстчына і Гомельшчына – яскравы прыклад таго, што адбываецца з кліматам. У гэтым плане стала прынята спасылацца на пастаянныя засухі, абмяленне рэк і меліярацыйных каналаў, чаго тры-чатыры дзясяткі гадоў таму не назіралася ў прынцыпе. “Гэта якраз і ёсць гэтая “савецкасць” – вось па-старому мы ўсё: “Абмялела, то дрэнна, гэта дрэнна…” – заўважыў кіраўнік дзяржавы.
Аляксандр Лукашэнка звярнуў увагу на магчымасці і існуючыя водныя рэсурсы, галоўны з якіх – Прыпяць: “Куды ідуць гэтыя воды? Няхай бы сабе Украіна карысталася спаўна дняпроўскімі водамі… У мора ідуць гэтыя воды. Дык чаму ж мы сёння не думаем аб тым, што гэту ваду трэба “павярнуць назад” тады, калі трэба, і туды, куды трэба?”
У сувязі з гэтым кіраўнік дзяржавы згадаў, што кіраўніцтва Гомельскай вобласці прапаноўвала яму вярнуцца да тэмы Днепра-Бугскіх каналаў. Аляксандр Лукашэнка даручаў старшыні аблвыканкама Івану Крупко ўнесці прапанову. “Ён мне як унёс прапанову – у мяне ў вачах пацямнела. Таму што такіх вялікіх грошай у нас проста няма”, – сказаў Прэзідэнт.
Аляксандр Лукашэнка тым не менш адзначыў, што наконт гэтай ідэі трэба яшчэ параіцца з дасведчанымі людзьмі, якія разбіраюцца ў гэтай тэме: “Калі трэба гэтым шляхам ісці і гэта акупіцца і дасць рэзультат Гомельскай вобласці – перахрысцімся і пачнём рабіць. Таму трэба давесці ўсё да ладу. Не тое што недзе ідэю пачулі добрую і “бабахнулі”: “Давайце грошы!”. Трэба разумець. Ёсць у нас грошы ці не, будуць ці не, дасць вынік ці не. Калі дасць – будзем шукаць грошы”.
“Мы гэты задзел – сістэмы Днепра-Бугскіх каналаў – не загубілі. І сёння, калі патрэбна вільгаць на палях, ён можа вельмі спатрэбіцца. Але мы не павінны ісці ўсляпую. Трэба вельмі сур’ёзна гэта пытанне прапрацаваць. Падумайце над формулай цаны пытання”, – дадаў кіраўнік дзяржавы.
Аляксандр Лукашэнка нагадаў і аб задачах па меліярацыі, якая ў цяперашніх умовах павінна быць арыентавана не толькі на асушванне, але і ў тым ліку на абвадненне тэрыторый: “У нас часта засушыць у Гомелі (глебы мы ведаем гомельскія), і нам патрэбна была б вадзічка. Але аб гэтым трэба сёння думаць. Не асушваць, а меліярацыя – абвадненне павінна быць. Дарэчы, мы ж і будавалі так гэтыя меліярацыйныя сістэмы. Проста трэба аднавіць гэта і працаваць. Гэта напрамак нашых дзеянняў. Ад зямлі трэба ісці”.
Прэзідэнт арыентуе з улікам усіх гэтых фактараў выбудоўваць стратэгію і тактыку развіцця раёнаў, уключаных у праграму развіцця раёнаў Прыпяцкага Палесся, не забываючы ў той жа час пра добраўпарадкаванне тэрыторый, прылеглых да Прыпяці, захаванне экалогіі ракі і ўнікальнай прыроды.
“Прырода ўнікальная, своеасаблівая. У свеце нідзе прыроды такой няма. І глебы вельмі своеасаблівыя. І я не сказаў бы, калі ў цэлым узяць, што яны багатыя. Пясчаныя глебы ў асноўным. Але калі з розумам, то і на іх можна атрымліваць адпаведныя ўраджаі”, – упэўнены кіраўнік дзяржавы.
Прэзідэнт таксама звярнуў увагу на турыстычны патэнцыял рэгіёна, які ўвогуле не раскрыты, – ад нацпарку да аграсядзіб. “А гэта добрыя грошы, – заўважыў Аляксандр Лукашэнка. – Нам трэба самім гэтым займацца. Недзе нешта будаваць. Паколькі для турыстаў сёння важны не палацавыя гэтыя інтэр’еры. Ім хочацца нешта з дрэва, прыехаць адпачыць з дзеткамі. А гэта мы ўмеем рабіць. У нас для гэтага ёсць усё. І рабіць гэта трэба не тое што хутка, а імгненна. Таму што гэта залатая жыла страчваецца. Таму трэба рабіць імгненна, каб акупіць недарагі праект і зарабіць на гэтым грошы”.
